【開箱】My Little Box 2022年 10月號

2022-10-22
Posted by 雪梨

22 10 月

有錢就身痕第二期！
繼續同大家介紹日本美妝盲盒 My Little Box！

第一次見My Little Box 咩嚟㗎

日本美妝盲盒 My Little Box 會係按月訂購同出貨的，每月訂閱價格¥3350。每個月會設定唔同主題，嚴選當季流行美妝同時尚配件、雜貨等，並以精美插畫包裹再寄畀訂購者嘅驚喜禮物盒。
佢哋已經有八年歷史，而且合作品牌都有一定嘅知名度，唔怕入面係普遍清貨福袋概念嘅雜牌產品怕用壞人，亦大大減低咗買咗返去後唔實用得個擺字嘅機會！
小編自上個月開始訂閱幾期，嚟緊幾個月都會為大家開箱，揭開廬山真面目(╯✧∇✧)╯

上期9月號回顧
https://www.gtm.hk/all/my-little-box-2022-sept/

10月號 BALADE ARTY

My Little Box 10月號以BALADE ARTY為主題，意思係法文嘅「藝術步行」，喺微涼嘅季節中，悠然地於城中散步，欣賞多彩嘅法式藝術。
適逢香港都開始轉涼，今期帶畀我哋都係會以滋潤保濕類型嘅單品同日常小雜貨，包裝會係迎合主題設計嘅紙盒比較硬實，之後可以用嚟收納其他嘢~

首先睇下主題小冊子，左面首頁有個浪漫嘅小簡介：

「一個秋日宜人的午後，你漫步於歐洲街頭，
街道兩旁是美麗的新藝術風格建築，有間花店裝飾著五顏六色的鮮花，還有個古董跳蚤市場。
這個月，您可以隨意在城市中漫步或參觀藝術博物館。
何不沉浸在藝術氛圍中呢？新的邂逅應該在等著你。」

右面嗰頁介紹咗一啲著名嘅新藝術風格建築，例如西班牙聖家堂，搞到好想去旅行(´;ω;`)
後面頁數有列出今期內容單品同詳細介紹背後品牌及用法，今期仲有居法日裔youtuber 「GOROGORO KITCHEN 」井筒麻三子嘅訪問，小編用google translate嘅相機功能睇完都可以大致理解到，佢分享話法國雖然好chill但工作效率好慢搞到佢有時好燥底，都幾有趣ヽ( ° ▽°)ノ

睇返單品嘅部份，先嚟兩款Curél 嘅產品，相信乾燥肌敏感肌嘅朋友仔對呢個牌子都有啲認識，尤其小編平時都有用開佢嘅保濕面霜，今次開箱一見到即刻覺得相當實用先 (＇∀＇b )b
日本敏感肌膚護理品牌 Curél 於1999年成立，佢哋發現導致乾燥性敏感肌膚嘅原因在於皮膚嘅「細胞間脂質 Ceramide」不足，所以專注研發咗同天然Ceramide具有同樣功效、穩定性同足夠發揮效用嘅物質「潤浸保濕 Ceramide功能成分」，並推出各年齡層人士都啱用嘅溫和舒適產品，從此乾燥敏感肌嘅人群就有福了！

今次會有Curél保濕修護面膜同柔潤保濕身體乳液，喺香港分別係賣$98同$130。
保濕修護面膜敷10分鐘就可以為肌膚注入比平時乳液多10倍嘅「潤浸保濕Ceramide功能成分」，深入滲透至肌膚角質層，改善肌膚乾燥、脫皮、痕癢問題。實際使用時覺得好貼服，而且有獨特面膜設計多咗兩個可以輕鬆搣出嚟嘅小方型，方便敷埋平時覆蓋唔到嘅眼周/鼻翼/嘴角縫隙位置，滋潤晒成4片裝助你捱過換季！
柔潤保濕身體乳液 220ml 都足夠搽一段時間，除咗都係相當保濕之外，佢性質溫和，連孕婦同嬰兒幼嫩肌膚都適合使用㗎，秋冬季節真係要勤力啲搽body lotion 唔好偷懶啊！

其次會有 SOFINA iP 嘅土台美容液，作為日本製嘅肌底修護精華，透過專利微米技術嚟促進肌膚血管力，以二氧化碳製造出比毛孔還要小極微小嘅1/100mm微米碳酸泡泡，即「土台之力」，並提升後續護膚品嘅滲透，使肌膚細胞機能回復健康。

土台之力聽落有啲中二病，使用嘅時候按壓噴頭會唧出泡沫，但佢建議唔好喺手上搓開住，慢慢將泡沫搽上全臉，皆因佢要保留最多嘅碳酸量滲透到臉上，達至最佳護理效果。佢喺面上捽開嘅過程中會漸漸變做質地濃稠嘅精華液，初初使用時冇睇清楚見佢咁濃厚諗住偷懶淨係搽咗佢就瞓，但第二朝就甩皮了இдஇ 所以千其唔好好似傻仔小編咁誤會咗，佢只係令後續使用嘅護膚品更易吸收，本身並冇保濕功能㗎！

第一次喺化妝盲盒入面見到食物 (●▼●;)
來自法國嘅健康天然餅乾牌子Gerblé，標榜不使用防腐劑、色素或起酥油，而且含有大量健康飲食所必需嘅維生素、礦物質同膳食纖維。
有十個類型會隨機分發，小編今次收到嘅係提子乾餅乾，一盒一包有四塊，有啲偏硬但早餐時當係oreo咁浸一浸牛奶食又幾好食同飽肚，想搵健康啲嘅餅乾零食就可以留意下~

又嚟到My Little Box 自家出品，每次盲盒都會加入1 – 3件自家出品，多數以雜貨飾品為主。
「隨住季節嘅變化。巴黎嘅公園同市區已經染上咗秋天嘅色彩，家中同辦公室內都擺放住時令鮮花。今個月不如積極融入呢種法國生活方式嚟享受呢個季節？」
配合主題，今次嘅出品會係透明花樽，用秋天花朵為你嘅日常生活增添色彩 ε(*´･∀･｀)зﾞ靈感來自可能喺跳蚤市場可以搵到嘅歐洲古董花瓶，淡粉色復古感嘅設計喺花樽內放咩都可以配合到。外盒會係有啲優雅精品感覺嘅紙盒，入面就係泡泡紙包裝嘅花樽，樽底會有My Little Box 自己嘅刻印，佢經歷漂洋過海過嚟都冇事相信都有返咁上下堅硬！

小冊子會有相關介紹，官方建議可以搭配大理花、波斯菊等秋天花卉，以及乾花，配搭出自己鐘意嘅室內風格！
另外仲提供咗由花卉市場建議嘅實用養花小貼士 ✧*｡٩(ˊᗜˋ*)و✧*｡購買鮮花後要先將根部同花樽沖洗乾淨，防止細菌喺鮮花上生長。由於自來水兩日左右就會滋生細菌，所以佢都建議每日換水，並喺莖尖位切走2cm左右，會更容易吸收水分，水面以下多餘嘅葉都可以剪走，防止啲水變污糟同減少蒸騰令葉子中嘅水分流失減少。使用鮮花營養劑除咗保持花嘅顏色同亮度，仲可以防止細菌生長保持啲水乾淨~

人愈大對大自然同植物愈感趣，鮮花保持到耐啲，每日見到佢開得燦爛個人都精神啲！

▲ 放咗啲辦公室嘅乾花入去，意外地都幾襯，雖然就只係普通嘅花樽仔(◔౪◔) 之後都可以試下浪漫地插下鮮花～