有錢就身痕 第三期！今期delay咗但一樣充滿驚喜~
繼續同大家介紹日本美妝盲盒 My Little Box！
第一次見My Little Box 咩嚟㗎
日本美妝盲盒 My Little Box 會係按月訂購同出貨的，每月訂閱價格¥3350。每個月會設定唔同主題，嚴選當季流行美妝同時尚配件、雜貨等，並以精美插畫包裹再寄畀訂購者嘅驚喜禮物盒。
佢哋已經有八年歷史，而且合作品牌都有一定嘅知名度，唔怕入面係普遍清貨福袋概念嘅雜牌產品 怕用壞人，亦大大減低咗買咗返去後唔實用 得個擺字嘅機會！
小編自上兩個月開始訂閱幾期，嚟緊幾個月都會為大家開箱，揭開廬山真面目(╯✧∇✧)╯
上期10月號回顧
https://www.gtm.hk/all/my-little-box-2022-oct/
11月號 Into the woods
My Little Box 11月號以Into the woods為主題，走進木林裹深呼吸 感受清澈森林嘅香氣，發現已經染上秋色嘅樹葉，仲有吹拂住樹木嘅舒適微風，內心得以治癒。
香港都開始有踏入冬天嘅感覺，今期帶畀我哋嘅會有化妝小sample同以滋潤保濕為主嘅產品 以及日常小雜貨，包裝會係靚靚秋冬感嘅插畫紙盒，同樣比較硬實，經過收到幾期My Little Box ，而家已經擁有幾款唔同風格嘅紙盒，呢個尺寸用嚟收納都相當唔錯~
11月主題主題小冊子列咗一個為期兩日嘅森林放鬆計劃，單品都係環繞住呢個計劃嚟設計嘅，不過唔跟都無礙你去享受產品同內容~
Day2 嘅早上行程推薦大家食一個精神滿滿嘅牛油果豪華早餐，仲講解咗分辨牛油果熟度嘅實用小技巧，重點要留意嘅係佢嘅顏色同蒂頭：
◉ 如果只係綠色、蒂頭稍微突出就暫時未夠熟，需要喺室溫下存放多 3 – 7日。如果想快啲熟可以搣甩個蒂頭、並同埋香蕉/蘋果一同放入紙袋就可以加速成熟
◉ 呈綠色並帶深綠色斑點、蒂頭微微凹陷就好接近成熟了， 喺室溫下存放多 2 – 3 日就差唔多！
◉ 外皮接近黑色，蒂頭下沉 同果實之間有小縫隙，輕輕按壓時感覺柔軟 就代表可以食啦 ｡:.ﾟヽ(*´∀`)ﾉﾟ.:｡ 如果未想食住可以放入雪櫃，可保存多3 – 5日
睇返單品嘅部份，大件嘅產品會有德國香薰品牌Kneipp 薰衣草身體油 100mL，香港售價大約係$180。
雖然個人唔係咁中意薰衣草味，但實際使用嘅時候覺得佢嘅質地比想像中易吸收，用咗嚟當潤膚膏咁搽全身 途中順便按摩下肌肉，然後就好快變到好似平時搽完潤膚膏咁嘅感覺 淨係薄薄一層包住皮膚，同埋都比較大支 應該可以用大半個冬天～
▲ 德國製造㗎，並且唔會喺動物身上進行過實驗測試！
第二樣會係上期預告過嘅法國少女系品牌Paul & Joe！分別係Moisturizing Foundation Primer 糖瓷絲潤隔離乳 01同02號色、Fondant Cream Foundation、Veil Foundation 102。
▲ 雖然三款都係sample，但其實隔離乳份量都唔少㗎，而且樽仔仲幾靚添(*´∀`) 薄薄嘅顏色可以遮蓋住比較淺嘅瑕疵，提亮肌膚及長效鎖水～
▲ 兩隻色都畀咗你，01 自然透亮粉色色調應該適合大部份女仔，02 健康自然橙色調，比較貼合自然膚色，但個人覺得用上皮膚之後有啲偏黃( ˘･з･)
緊接有日本牌子ETVOS，佢哋最出名嘅會係礦物粉底，今次會係1 set 保養sample組，呢個系列添加咗 ETVOS獨家嘅 CERAMIDEAL保濕成分。質地都幾潤，出去staycation 或者去旅行用就啱晒！
另外仲有一塊 ON&DO 溫感面膜，呢個品牌主打天然成份，選用真正對有益嘅成份，佢話單用可以令肌膚得到深層循環，或者先敷上保濕面膜，再疊上溫感面膜一齊敷，水分就好容易滲透。
不過用落覺得除咗冬天唔使凍住咁敷mask之外，好似冇太大分別 XD
又嚟到My Little Box 自家出品，每次盲盒都會加入1 – 3件自家出品，多數以雜貨飾品為主。
「據聞通過將注意力轉移到眼前的事物上，您可以平靜下來 並放鬆身心。每天我們都會不自覺地思考和查看 SNS，讓我們的頭腦充滿壓力。在這種情況下，何不來一杯據說可以從內暖身、消除疲勞的正念五香茶休息一下呢？」
今次嘅其中一樣小雜貨會係松果造型茶隔，造型得意之餘都幾實用，試咗沖放茶葉喺入面都唔會漏走。
▲ 加入熱水後，茶葉好快就沖好，而且佢上半part 會漂浮喺水面，方便浸到差唔多嘅時候可以隨時拎起 唔怕沖到好苦！
▲ 喺小冊子入面佢推薦一款正念暖心五香茶，但唔肯定有冇翻譯錯，配方會係喺阿薩姆紅茶中加入橘子乾、米飯、肉桂棒，指可以被溫暖辛辣嘅香氣治癒，對抗寒冬 ( •́ _ •̀)？歡迎勇者們挑戰一下～
第二樣自家出品係一對襪，「做好準備！ 想要盡情感受大自然嘅日子。，你需要一對行好多路都仍然舒適嘅襪 去陪伴你喺森林中散步。 」對襪可以令對腳唔攰我就唔係太信，但佢可愛嘅包裝第一下已經好吸引人，設計成一間屋仔形狀，屋頂仲要畫咗落葉同寫上「Randonnée d’automne」法文嘅「秋季遠足」。
綠卡其色嘅中襪質地都幾親膚舒適，而且標榜使用 100% 對地球同環境友善嘅可回收材料。腳板位寫住「NO MOUNTAIN HIGH ENOUGH」，靈感來自經典歌曲《Ain’t No Mountain High Enough 》嘅歌詞， 冇一座山高到可以阻止你去尋找你嘅愛人，亦冇一種障礙難到可以阻礙你去實現你嘅目標，可能呢對襪係想你抱住呢份積極嘅心態 踏上呢個放鬆嘅旅程 (ง๑ •̀_•́)ง
今期產品整體嚟講都幾得意，對小編嚟講最實用嘅係ETVOS 保濕套裝，兩支帶出去聖誕party同statcation用啱啱好，而且都幾夠潤 第二日化妝都冇甩皮 雖然近排每一期都已經有畀保濕套裝
另外已經收到下一期My Little Box，仲要唔小心劇透咗自己 見到會有實用嘅首飾盒，期望下期會更正(´∀｀)♡今個月你都辛苦了 下個月見～
My Little Box 日本官網
https://www.mylittlebox.jp/
My Little Box 2022年11月號盲盒內容－官方發佈版
https://www.mylittlebox.jp/box/into-the-woods
日本其他網站 | 人手報價
https://www.gtm.hk/shop/mxj/
