我眼睛想旅行！但肉體仲要工作未旅行到住(´;ω;`)
咁唯有忙裏偷閒，玩住呢款Board Game先啦，請上車！！
《請上車》Board Game 前身為日本遊戲《Let’s Make a Bus Route》，台灣代理重新設計產品介面以及美術，推出中文版，中文玩家有福了(ﾉ◕ヮ◕)ﾉ*:･ﾟ✧
遊戲係要喺倫敦同紐約設立最受歡迎嘅巴士路線，巴士業競爭激烈，要精明地令對手陷入交通阻塞嘅困境，同時要規劃出最佳嘅旅客巡遊路線。
每次揭開一張牌、畫出理想路線、讓你嘅乘客順利到達目的地。
拉埋親朋好友一齊加入呢場輕策略遊戲！透過完成目標，喺暢遊城市中，挑戰獲得最高分吧！
開車前入廠檢查下先
一打開就會見到遊戲配件，做工相當仔細，配件包括：
中文說明書 × 1
雙面圖板 × 1 (一面為紐約/另一面為倫敦)
雙面遊戲紙 × 50
車票卡 × 12
公共目標牌 × 6
每位玩家有路標標記 × 32 以及對應顏色的出發點標記 × 1 (五人份)
個人目標卡 × 10
查票員棋子 × 1
鉛筆 × 5
馬路如虎口 交通規則要遵守
作為專業嘅巴士司機，開車前緊係要先了解交通規則٩(｡・ω・｡)و
地圖會係雙面設計，2-3位玩家會係使用紐約地圖，4-5位玩家就會係使用倫敦地圖，今次我哋開箱同試玩會係使用倫敦地圖～
首先隨機選擇兩張公共目標卡，並將佢哋翻到黃色（10分）一面，放於地圖板上對應嘅位置。
顧名思義，呢個就會係大家嘅兩個公共目標，最先達成到公共目標嘅玩家就可以得到10分，達成之後會將目標卡翻面，後來再達成呢個目標嘅就只有6分，再慢嘅話就冇獎勵分㗎啦～
例如今次抽到嘅兩個目標會係 最先經過三次皮加地利圍 同 最先載到五位婆婆 嘅就可以得分！
▲ 公共目標卡得分嘅時候就可以記錄喺遊戲紙上呢個位置
跟住每位玩家抽一張「旅遊指南」，同拎走一組鍾意顏色嘅路線（木條）與起點指示物（紅綠燈仔），年紀最大嘅玩家拿走查票員棋子（紅色圓棋）做起始玩家。
「旅遊指南」會係每個玩家個人嘅秘密目標。如果遊戲結束時，巴士路線有遊走齊三個指定check point就可以拎到額外10分，經過唔到或者冇經過晒三個就冇分～
例如今次抽到會需要經過「a」、「g」同「m」 。
遊戲結束時巴士路線有成功經過三個check point 「a」「g」「m」，所以可以拎到額外10分～
▲ 達成旅遊指南得分可以記錄喺呢個位置
作為巴士司機，最緊要當然係車客啦，乘客會有分為四個種類：婆婆、觀光客、商務人士同學生妹。
四種乘客都有唔同嘅計分方法
婆婆：計分最簡單，載到嘅每個婆婆都有分，越後上車嘅婆婆每位計嘅分越多
觀光客：每次載到一位觀光客，就喺紀錄紙上剔一位。觀光客會喺經過觀光景點時落車，嗰個時刻就會計嗰一橫行嘅分。下次再有觀光客上車就會由下一行由頭計起。例如當載到第三位觀光客後經過咗淺藍色景點，就可以塗黑第四個觀光客位，然後往下對應，得到９分。
商務人士：商務人士同觀光客嘅計法相近。例如載咗兩位商務人士後到達紫色商業大樓，就塗黑最後一位嘅格仔，然後往下對應得到４分，而且會額外贈送一位觀光客。
學生妹：每載到一個學生妹就畫一格學生妹，每經過一間學校就畫一格學校，最後計分將兩邊數量相乘 就係學生妹部分嘅總分。
看似複雜但遊戲紙上會有晒相應提示，照剔同刪就無問題～
準備好就開始了！請上車！
首先將12張車票洗牌，之後每位玩家隨機抽兩張，玩家可以選擇手頭上其中一張嘅號碼作為起點。
例如小編揀咗5號，就將起點指示物放喺5號燈位。所有人都設置好起點之後，就需要回收返所有車票，再重新洗牌形成車票牌庫～
每個回合會由車票牌庫翻開一張車票，玩家依照紅色查票員棋仔嘅順時針方向，順序根據自己填寫紙上嘅提示來擺路線。（每個人拎到嘅遊戲紙，上面數字對應嘅路線符號唔一定一樣㗎，所以記得睇自己嗰張，唔好跟人～）
例如今個回合抽到5號車票，對小編嚟講會係要擺出只有一個彎嘅路線，但其他玩家可能要擺嘅係其他類型嘅路線。
小編今次依照抽到路線嚟擺，要擺出只有一個彎嘅路線，個人策略會想做到接載五位婆婆嘅公共目標，所以優先揀咗有婆婆嘅方向。
行完呢個彎，經過咗婆婆同商務人士，就可以喺遊戲紙上面記錄返！
有時抽到車票嘅指定路線唔啱你嘅計劃，唔想行去嗰個方向 想改變路線嘅話，就會需要付出代價！ψ(｀∇´)ψ
每改一次路線就會需要喺紅色位置畫一格（代表最終扣分）。如果呢個框嘅格子畫滿咗，就冇得再任性改路線喇～
另外當你要行到人哋之前已經起好嘅規劃路線上面時，就會需要畫一格塞車扣分（每遇到一條其他人嘅路線指示物就畫一格）。
▲ 塞車一條路就需要記低一次，如果一次過塞幾段路 就要記錄幾次，條數都好甘㗎இдஇ
遊戲共12回合，最後揭晒12張車票，所有人擺完路線，畫完填寫紙，就會進行最後計分 加加減減，最高分者獲勝！
另外仲有其他細節嘅遊戲規則，玩之前最好都參考返說明書同官方介紹影片！
玩後感
一開始見到要mark埋計分，以為實係好複雜，但其實玩一次基本上已經習慣咗個玩法 下一鋪可以更有策略地去計劃路線 (̿▀̿ ̿Ĺ̯̿̿▀̿ ̿)̄
雖然遊戲紙係消耗品，但官方提供埋計分紙下載（下方有連結），唔夠玩仲可以自己print。
個人覺得多人玩嘅時候，個地圖塞車塞到步步都要扣分 越亂越好玩 我要見到血流成河，係一個輕鬆又要小小用腦嘅得意遊戲ヽ(*´∀`)ﾉ
《請上車 Board Game》－中文版｜$199
https://www.gtm.hk/shop/get-on-board/
遊戲人數: 2-5人
遊戲時間: 30分鐘
適合年齡: 8歲以上
官方影片介紹 ➤ 《請上車》遊戲、規則介紹
說明書下載 ➤ http://cloud.longshore.com.hk/index.php/s/gjbc4QtGJGvOFNF
計分紙下載 ➤ http://cloud.longshore.com.hk/index.php/s/2ZlIdrgEk0dekvt
