好窮好窮 窮到燶了(›´ω`‹ ) 當你窮到極嘅時候你會做得出啲咩…
一班海底探險家因為太窮而選擇冒險去深海尋寶，但實在太窮了唯有一齊租一架潛艇、共用氧氣筒。一個不慎 喺氧氣消耗完之前返唔切潛水艇就會得不償失，究竟探險家們可唔可以平安將寶藏帶返屋企呢？
《海底探險》由Oink Games 出版，呢間出版社專出一啲極簡畫風、細細盒嘅Board Game。係一款用骰子決定步數、以優先帶回最多寶藏爲目標嘅桌上遊戲。
之前同同事一齊玩過Oink Games 唔同作品都一致好評，放喺屋企或者帶出去玩都一樣方便！
見鬼勿O嘴，潛水怕屈機，潛艇缺隊友(･ω´･ )
《海底探險》得一個手掌咁大，但遊戲配件都唔少同相當精美，包括：
說明書（英文及日文） × 1
骰仔（1-3點） × 2
探險者粒粒 × 6
氧氣標記 × 1
潛水艇圖板 × 1
遺跡板塊（4種等級各8個） × 32
空白板塊 × 16
其中遺跡板塊就係玩家們要出海收集嘅寶藏，會有分成4種等級，每個等級都有唔同嘅分數範圍。
喺最後嘅結算階段先可以反轉睇係幾多分(ゝ∀･) 所以未到最後都未知邊個會贏，玩家唯有帶盡量多嘅遺跡寶藏返潛艇～
想得到我的財寶嗎？想要的話就給你吧，去找吧！我把世界上的一切都放在那裏！
遊戲會進行三個回合，三個回合後獲得最多分數嘅玩家為獲勝者。為咗獲得積分，玩家要將盡量多嘅遺跡寶藏帶回潛艇。
遊戲一開頭先將遺跡板塊沿住潛艇 由低等級排到高等級排晒出嚟，探險者就喺潛水艇內準備出發。
之後就輪流出發，擲骰決定步數，踩到嘅遺跡寶藏可以選擇收唔收集，因為一旦收集咗遺跡寶藏 拎咗喺手，身上面嘅重量增加，之後嘅步數同氧氣都會消耗得多啲㗎。
如果選擇拎咗腳底嘅遺跡寶藏嘅話，要放返一粒空白板塊去腳底取替～
如果玩家身上面帶住咗遺跡寶藏，就要開始扣相應數量嘅氧氣同步數。
例如你身上有三個遺跡寶藏，喺行動嘅時候除咗氧氣標記要扣三格之外，擲骰嘅步數都要扣三，即係擲到四都好 都淨係行到一步！
如果擲骰嘅步數有經過其他玩家，玩家企緊嘅嗰格就唔計一步，可以直接跳過佢嗰格～
每次擲骰前，玩家都要選擇要唔要返回潛艇，選擇返回後就唔可以再回頭㗎喇，所以都要好好選擇折返嘅時機！
如果玩家身上無帶有遺跡寶藏嘅話係唔可以選擇折返潛艇住的。
如果你喺行返潛艇嘅途中行到空白板塊，而你又覺得身上行裝太重嘅話，可以選擇將其中一粒遺跡寶藏放返喺腳下，咁回程可能會輕鬆啲(`・ω・´)
玩家要喺氧氣消耗完之前返到潛艇，手上嘅遺跡寶藏先可以真正算入你袋！
如果喺消耗完之前都未返到潛艇上嘅話，玩家手上嘅遺跡寶藏就會回歸深海，需要三個一疊咁放喺遺跡板塊嘅尾，下個回合如果有玩家成功行到去拎就係一份大秘寶 反勝嘅大好機會！
另外完結一個回合後要將深海入面嘅空白板塊抽走，成條遺跡航道就會更緊密，後面回合亦更加容易拎到高等級嘅寶藏ლ(╹◡╹ლ)
之後就繼續玩Round 2 同Round 3，玩完三個回合之後就可以結算手頭上順利帶到返潛艇嘅遺跡寶藏，反轉後面加埋分數總和，最高分嘅就係大贏家ヽ(●´∀`●)ﾉ
喺過程中除咗要收集到盡量多同高等級嘅遺跡寶藏之外，仲需要顧及自己可以帶到返去潛艇嘅能力，再要提防其他玩家喺自己行到好遠嘅時候突然回頭 害到你唔夠氧氣返去！
整體嚟講係一個簡單得嚟又可以陷害朋友嘅遊戲σ`∀´)σ 快啲買返去同屋企人朋友一齊試下玩～
《Oink Games Board Game Series》－Deep Sea Adventure｜$179
https://www.gtm.hk/shop/deep-sea-adventure/
遊戲人數: 2-6人
遊戲時間: 約30分鐘
適合年齡: 8歲或以上
官方影片介紹 ➤ How to Play with Boinx “Deep Sea Adventure”
